Karadizc heillaði landa sína með náttúrusmyrslum

Á meðan Radovan Karadizc fór huldu höfði ferðaðist hann meðal annars til Austurríkis og heillaði landa sína þar með handayfirlagningu og náttúrusmyrslum. Lögreglumenn sem ræddu við hann þar grunaði aldrei að þessi skeggjaði og síðhærði spekingur væri í raun eftirlýstur fyrir stríðsglæpi og fjöldamorð. Stuðningsmenn hans heima eru reiðir yfir handtökunni.

Þúsundir manna hafa safnast saman víðsvegar í héruðum Bosníu-Serba, þar á meðal í borginni Pale austur af Sarajevo, þar sem Karadizc átti sér traust vígi á stríðstímanum. Þar safnaðist fólk saman undir myndum af forsetanum fyrrverandi og klæddist skyrtum með áletrun eins og Serbnesk hetja.

Handtaka Karadizcs hefur vakið reiði í hópi serbneskra þjóðernissinna sem telja handtökuna enn eina sönnun þess að Vesturlönd ofsæki Serba og kenni þeim um allt sem miður fer.

Nú beinist reiðin einnig að þeim sem leyfðu að Karadizc væri handtekinn og að leitin að honum hafi valdið þjáningu fjölmargra saklausra borgara.

Og víðar er mótmælt. Róttækir þjóðernissinnar fara daglega um götur Belgrað og mótmæla handtökunni og því hvernig alþjóðlegir fjölmiðlar hafa sagt frá málinu.

Á blaðamannafundi flokks róttækra þjóðernissinna, stuðningsmanna Karadizc, sakaði formaður flokksins forseta Serbíu, Boris Tadic, um föðurlandssvik og sagði að hann gæti allt eins mætt sömu örlögum og Zoran Djindjic, forsætisráðherrann sem var skotnn til bana 2003.

Um helgina hefur verið upplýst að á þeim árum sem Karadizc fór huldu höfði hafi hann meðal annars ferðast til Austurríkis og heilað landa sína þar með handayfirlagningu og náttúrusmyrslum. Lögregla hafi fyrir tilviljun yfirheyrt hann vegna óskylds máls - en ekki áttað sig á að þessi síðskeggjaði og síðhærði spekingur væri í raun eftirlýstur stríðsglæpamður og fjöldamorðingi.