Íslandsför Max Keiser

Max Keiser, fyrrum verðbréfabraskari á Wall Street en nú blaðamaður, fjármálasérfræðingur og faðir Hollywood-kauphallarinnar svokölluðu, ritar grein á vefinn Huffington Post um kynni sín af íslensku hagkerfi, leiðangur sinn hingað til að rannsaka það vorið 2007 og viðbrögð íslenskra viðmælenda þegar hann spurði þá hvað yrði þegar bólan spryngi.

„Ég fór til Íslands til að kynna mér það sem menn kölluðu kraftaverkahagkerfið. Þarna var ein tekjuhæsta þjóð heims með banka og fyrirtæki sem keyptu breskar stórverslanir í kippum. Hvernig fór 300.000 manna samfélag að þessu?" skrifar Keiser.

Ásgeir Jónsson hló

Hann lýsir því, og birtir myndband með, þegar hann ræddi við Ásgeir Jónsson, hagfræðing og yfirmann greiningardeildar Kaupþings, sem hló þegar Keiser spurði hann hvort ekki væri hætta á því að fjöldamótmæli brytust út í kjölfar þess að alþjóðlega skuldabólan spryngi.

„Allir sem ég ræddi við á Íslandi gáfu mér einhverjar óendanlega flóknar skýringar á þessu hagræna kraftaverki en ég óttaðist að hlutirnir væru í raun sáraeinfaldir og þarna væru sjóðandi heitir fjármunir að streyma frá brunni alþjóðlegrar spákaupmennsku. Væri trú mín á rökum reist ætti Ísland von á harkalegri brotlendingu því óhjákvæmilega boðar innstreymi heitra fjármuna ávallt útstreymi þeirra á ný," skrifar Keiser enn fremur.

Evrópsk þjóð, amerískur vinnumarkaður

Hann segir 50 tíma vinnuviku Íslendinga samsvara því að hér búi 500.000 manns en ekki 300.000 og segir Íslendinga evrópska þjóð með amerískan vinnumarkað.

„Svona var það nú. Fljótari en byssukúla, öflugri en eimreið, klífur hæstu byggingar á sekúndum. Sjáið þarna! Þetta er fugl, þetta er flugvél, þetta er Súpermann! Þetta er lygasaga sem þjóðin trúði," klykkir Keiser út en hann er þekktur fyrir allt annað en að draga fjöður yfir kenningar sínar svo sem glöggt má sjá á heimasíðu hans.