Aðgerðir Breta mannréttindabrot af verstu sort

Guðni Ágústsson, formaður Framsóknarflokksins, segir aðgerðir breskra stjórnvalda gegn íslenskum fyrirtækjum mannréttindabrot af verstu sótt og vill að breska ríkisstjórnin verði kærð hið fyrsta.

Í umræðum um stöðuna í efnahagslífinu á Alþingi sagði Guðni að allt hefði farið á versta veg, bæði hér og fyrir utan landsteinana. Það mætti segja að það geisaði heimsstyrjöld um viðskipti. Enginn hefði sé þessa þróun fyrir þótt margir hefðu flutt varnaðarorð um heimskreppuna sem hefði hafist í Bandaríkjunum fyrir ári. Þeirra á meðal hefðu verið framsóknarmenn. Guðni sagði að þetta kallaði á uppgjör og til þess þyrfti virta endurskoðendur og lögfræðinga, flokkana á þingi og jafnvel erlenda aðila.

Guðni gagnrýndi ríkisstjórnina fyrir að hafa ekki enn ákært bresk stjórnvöld fyrir þeirra framgöngu. Þau hefðu ráðist inn í Landsbankann og Kaupþing og hryðjuverkalög væru fáheyrð aðferð gegn lítilli vinaþjóð. Hinn siðmenntaði heimur hlyti að fordæma vinnubrögðin. Það hefði verið framið vopnað rán og banka rænt af þjóðinni en allt hefði bent til þess að Kaupþing myndi standa kreppuna af sér áður en bresk stjórnvöld gripu inn í. Kæra ætti breska heimsveldi til hæstu skaðabóta.

Guðni sagðist trúa því að á rústum fjármálakreppunnar risi nýtt Ísland þar sem græðgi myndi víkja fyrir lögmálum viskunnar. Nú riði á að jafnræði gilti milli vinnubragða skilanefnda og einstaklingar og fyrirtæki nytu jafnræðis þegar skilanefndir bankanna væru að störfum. Úr eignum bankanna yrði að gera sem mest verðmæti, annars risi Ísland ekki til nýs hagvaxtar.

Þá sagði Guðni að svar yrði að fást við því hvers vegna skýrslu breskra hagfræðinga um stöðu íslenska kerfisins, sem unnin hefði verið fyrir Landsbankann, hefði verið stungið ofan í skúffu. Spurði Guðni hvort ráðherrar og þingmenn hefðu lesið þessa skýrslu.

Guðni sakaði enn fremur Ingibjörgu Sólrúnu Gísladóttur, formann Samfylkingarinnar, um að hræra í blóði sjálfstæðismanna með umræðum um Evrópusambandið. Leiðin að myntsamstarfi yrði ekki á dagskrá í bráð. Íslendingar skyldu sitja einir að auð sínum. Þá sagði hann brýnt að fá fram þau skilyrði sem Alþjóðagjaldeyrissjóðurinn setti fyrir aðstoð við Ísland. Fagnaði hann stýrivaxtalækkun morgunsins og fór fram á frekari lækkun.

Guðni sagði enn fremur að mannauðurinn hér á landi væri dýrmætastur. „Beitum oddinum fast og Ísand skal rísa og líta margan hamingjudag," sagði Guðni enn fremur í áeggjan til þjóðarinnar.