Nördalegasta hátíð landsins í jákvæðum skilningi

„Í jákvæðum skilningi er þetta nördalegasta hátíð ársins. Við erum stolt af okkar „fagidiotisma" en hátíðin á samt sem áður að höfða til allra tónlistaráhugamanna," segir Stefán Jón Bernharðsson, hornleikari og einn af aðstandendum norrænnar hornleikarahátíðar sem hefst í kvöld með stórtónleikum í Salnum, Kópavogi.

Hátíðin stendur yfir til 21. júní en þetta er í fyrsta sinn sem hátíðin er haldin hérlendis. Slíkar hátíðir hafa hins vegar verið haldnar með reglulegu millibili í Danmörku, Svíþjóð, Noregi og Finnlandi en það er Hornleikarafélag Íslands sem stendur að hátíðinni í þetta sinn. Þátttakendur og gestalistamenn koma hingað bæði frá Norðurlöndunum og öðrum heimshlutum og segir Stefán að mikill fengur sé í þessum góðu gestum.

Dagskráin er nokkuð fjölbreytt og telur Stefán að allir ættu að finna eitthvað við sitt hæfi. „Tónlistin á hátíðinni er kannski ekki popp eins og það er skilgreint í dag en þetta er vissulega popptónlist síns tíma og mikil gæðatónlist."