Ein tollgæsla - eitt tollumdæmi ályktar TFÍ

Einhugur er um það innan Tollvarðafélags Íslands að tollgæslan í landinu verði sameinuð undir eina stjórn og landið allt gert að einu tollumdæmi. Fjölmennur félagsfundur samþykkti ályktun þar að lútandi einróma í síðustu viku.

„Tollverðir vilja m.a. rannsaka öll tollalagabrot sjálfir líkt og gerist hjá tollstjóranum í Reykjavík og heimild er fyrir í tollalögum og að færanlegt aðgerðateymi tollstjóra vinni á landsvísu og verði eflt til muna," sagði Guðbjörn Guðbjörnsson formaður í samtali við Vísi. Hann segist vilja endurvekja embætti ríkistollstjóra og telur það hafa háð vexti og viðgangi tollsins mjög að slíkt embætti sé ekki til staðar [ríkistollstjóraembættið var aflagt í ársbyrjun 2001 og tók tollstjórinn í Reykjavík við flestum verkefnum ríkistollstjóra].

Vill tryggja góða samvinnu við lögreglu

Guðbjörn segir yfirmenn tollgæslu á landinu öllu sammála um þessar breytingar en sjálfur stýrir hann tollmiðstöð tollstjórans á Suðurnesjum. Hann segir Tollvarðafélagið þó mjög áfram um að góð samvinna við lögregluna verði tryggð, m.a. með gerð samstarfssamninga við lögregluyfirvöld á hverjum stað, verði af sameiningu tollgæslunnar, en lögregla aðstoði oft við tollafgreiðslu úti á landi í skjóli sérstakrar heimildar í tollalögum.

Guðbjörn segir það mikilvægt að landa svo stóru máli með fullri sátt allra hlutaðeigandi aðila og persónulega þætti honum það mikið ánægjuefni kæmust tollgæsla og tollstjórn loks óskipt undir fjármálaráðuneytið.