Óvissa með húsnæði áfangaheimilis

Eigandi húsnæðis sem Heilsuverndarstöðin ætlar að nýta sem áfangaheimili í raðhúsalengju í Norðlingaholti var tekinn til gjaldþrotaskipta í apríl. Því er enn óvissa um hvort starfsemin hefjist á réttum tíma.

Velferðarráð Reykjavíkur ákvað 9. apríl að ganga til samninga við Heilsuverndarstöðina um rekstur áfangaheimilis. Fjórir aðilar buðu í reksturinn og var tilboð SÁÁ fjórðungi lægra en tilboð Heilsuverndarstöðvarinnar. SÁÁ og Vinstri-grænir hafa gagnrýnt ákvörðun velferðarráðs.

Stella Víðisdóttir, sviðsstjóri velferðarsviðs, og Jórunn Frímannsdóttir, formaður velferðarráðs, hafa rökstutt ákvörðunina og meðal annars sagt skipta máli að Heilsuverndarstöðin hafði til taks ,,afar hentugt húsnæði fyrir umrædda starfsemi."

Raðhúsin Hólavað 1 til 11 í Norðlingaholti eru eigu félagsins Í skilum sem tekið var til gjaldþrotaskipta 8. apríl. Sigtryggur A. Magnússon, eigandi Í skilum, keypti í kjölfarið fyrirtækið Hagur.

,,Þetta voru bara mannleg mistök sem varð til þess að þetta fór á þessa leið," segir Sigtryggur og bætir við að gjaldþrotið hafi komið flatt upp á sig.

í yfirlýsingu dagsettri 25. júní og skrifuð er af Sigtryggi vegna húsanna í Hólavaði og lögð var fyrir borgarráð 26. júní segir að samkomulag Hags og Heilsuverndarstöðvarinnar sé ,,óbreytt og fyrirséð að það samkomulag muni standa."

Meirihlutinn lagði í kjölfarið fram bókun þar sem segir að húsnæðið standi ,,til boða eins og áður og verður afhent á réttum tíma."

Sigtryggur segist hafa gert munnlegan samning við kröfuhafa í þrotabú Í skilum um að eignirnar verði framseldar til Hags á allra næstu dögum. ,,Ég er á fullu með menn í húsunum og ég væri ekki af því nema ég væri með allt mitt á hreinu," segir Sigtryggur.

Jórunn segir að staðan sé óþægileg en bendir á að Reykjavíkurborg sé ekki búin að skrifa undir endanlegt samkomulag við Heilsuverndarstöðina um reksturinn og það verði ekki gert fyrir en að húsnæðismálin verði komin á hreint. ,,Það er ekki búið að loka þessu máli."

,,Ég veit ekki hvað gerist ef þetta gengur ekki eftir," segir Jórunn og bætir við að þörfin fyrir áfangaheimilið sé mikil. ,,Við höfum ekki neitt annað í hendi."

Ekki náðist í Guðmund Kristjánsson, skiptastjóra þrotabús Í skilum, við vinnslu fréttarinnar.