Borgarráð staðfestir samkomulag við Heilsuvernarstöðina

Meirihluti borgarráðs segir ákvörðun velferðarráðs um að ganga til samninga við Heilsuverndarstöðina um rekstur heimilis með félagslegum stuðningi byggja á faglegum rökum.

Styr hefur staðið um samkomulagið og hefur Ari Matthíasson, framkvæmdastjóri SÁÁ, gagnrýnt ákvörðun velferðarráðs harðlega. SÁÁ bauð í reksturinn og var tilboð samtakanna lægra en tilboð Heilsuverndarstöðvarinnar.

Þorleifur Gunnlaugsson, borgarfulltrúi Vinstri-grænna, hefur einnig gagnrýnt meirihlutann fyrir samkomulagið og lagði til á seinsta fundi borgarráðs að viðræðurnar yrðu stöðvaðar á meðan að kannað væri hvort staðhæfingar um að húsnæði Heilsuverndarstöðvarinnar stæði enn til boða.

Meirihluti Sjálfstæðisflokks og F-lista segir yfirlýsingu frá Heilsuverndarstöðinni varðandi húsnæðið liggja fyrir og það standa til ,,boða eins og áður og verður afhent á réttum tíma."

Í bókun meirihlutans segir einnig að það sé ,,ábyrðarhlutur að fara fram með mál með þeim hætti sem gert hafi verið án þess að fyrir því liggi góð og gild rök."

Svandís Svavarsdóttir, borgarfulltrúi Vinstri-grænna, lagði fram bókun á fundinum og sagði að verið væri að forgangsraða á pólitískum forsendum sem í ,,grunninn snúist um að hygla einkaaðilum á kostnað almennings og félagasamtaka." VG segir að gengið hafi verið til samninga við Heilsuverndarstöðina þrátt fyrir að lægra tilboð hafi legið fyrir hjá SÁÁ sem hafi ,,óumdeildanlega gríðarlega reynslu á sviðinu."