,,Hún er ekki aðstoðarkona mín"

Jórunn Frímannsdóttir, formaður velferðaráðs, segir skrif Þorleifs Gunnlaugssonar, borgarfulltrúi VG, um samvinnu hennar og sviðsstjóra velferðarsviðs vera sérstök.

,,Ég þekkti Stellu ekki persónulega áður en hún var ráðin. Hún er ekki aðstoðarkona mín," segir Jórunn og bætir við að eðlilega hafi hún komið af ráðningunni sem formaður velferðarráðs en það hafi ekki haft neitt með pólitík að gera.

Saman hafa Jórunn og Stella Víðisdóttir, sviðsstjóri velferðarsviðs, skrifað greinar um búsetuúrræði með félagslegum stuðningi. ,,Við höfðum legið undir ámæli fyrir að ganga til samninga við Heilusverndarstöðina um reksturinn," segir Jórunn og bætir við að eftir á að hyggja hafi hún átt að skrifa samskonar grein sjálf.

,,Það var hugsanlega ákveðið reynsluleysi hjá okkur báðum. Við höfðum báðar ætlað að skrifa greinar til verja okkur og ég stakk upp á að við myndum skrifa sameiginlega grein. Stella sagðist ekki vilja skrifa pólitíska grein og þá sagði ég að ég vildi einungis svara á faglegum nótum og sleppa pólitísku þrasi," segir Jórunn

Jórunn bendir á að ekki hafi verið gengið endanlega frá samkomulagi við Heilsuverndarstöðina. Hún er engu að síður sannfærð um að ákvörðun velferðarráðs hafi verið rétt. ,,Ég vona að starfsemi heimilisins hefjist sem allra fyrst."