Gjaldskrár óbreyttar í Reykjavík

Aðgerðaráætlun Reykjavíkurborgar vegna breytinga í fjármála- og atvinnuumhverfi var samþykkt samhljóða í borgarstjórn fyrr í dag með öllum greiddum atkvæðum.

Alvarleg staða á alþjóðlegum fjármálamörkuðum, minnkandi tekjur borgarinnar, fjöldi vísbendinga um þrengingar í fjármálum sveitarfélaga, fyrirtækja og heimila kalla að sögn borgarinnar á skýr skilaboð um meginlínur og markmið í viðbrögðum Reykjavíkurborgar.

Þrengri fjárhagsstöðu verður að svo stöddu ekki mætt með hækkunum á gjaldskrám fyrir grunnþjónustu eða skerðingu á þeirri þjónustu sem íbúar vænta frá leikskólum, grunnskólum, frístundaheimilum og almennri velferðarþjónustu.

Í aðgerðaráætlunin er kveðið á um að aukins aðhalds verður gætt í innkaupum og stefnt að 15% sparnaði í þeim á næstu mánuðum og árum. Engin áform eru um uppsagnir starfsfólks, en dregið verður úr kostnaði og nýráðningum í stjórnsýslu borgarinnar.

Fjárheimildir sviða verða að jafnaði ekki auknar á árinu 2008 þrátt fyrir vaxandi verðbólgu. Leitast verður við að tryggja fjármögnun fyrir nauðsynlegum framkvæmdum. Gerð verður áætlun um sölu eigna sem verður lögð fram samhliða fjárhagsáætlun.