Borgin ekki bótaskyld vegna hálkuslyss við leikskóla

Héraðsdómur Reykjavíkur sýknaði í dag Reykjavíkurborg af kröfu leiðbeinanda við leikskóla um að skaðabótaskylda borgarinnar yrði viðurkennd vegna hálkuslyss árið 2003.

Konan var á leið til vinnu sinnar í leikskólanum þegar hún rann á hálku á göngustíg að skólanum og féll aftur fyrir sig. Lenti hún illa á bakinu auk þess sem vinstri handleggur og höfuð hennar skullu í jörðina.

Konan hélt því fram að hún hefði farið varlega og verið í grófbotna skóm en samt hefði slysið orðið. Taldi hún að Reykjavíkurborg bæri ábyrgð á slysinu vegna óforsvaranlegra aðstæðna á gangstígnum. Borgin hélt því hins vegar fram að slysið hefði verið óhappatilviljun og væri sök konunnar.

Á það féllst héraðsdómur og vísaði meðal annars til þess að konan hefði starfað á leikskólanum í átta ár. Hún hefði því verið vel kunnug aðstæðum.