Próflaus á bíl kærastans

Lögreglan á Akranesi hafði í síðustu viku afskipti af ungri konu á rúntinum vegna einkennilegs ökulags hennar.

Þegar nánar var að gáð reyndist hún nýkomin á bílprófsaldur en hafði þó ekki tekið bílpróf. Reyndist hún hafa tekið bíl kærasta síns traustataki eins og segir í dagbók lögreglunnar. Var foreldrum stúlkunnar gert viðvart um uppátækið og hlaut hún sekt í ofanálag.

Þessu til viðbótar stöðvaði lögreglan á Akranesi mann fyrir fíkniefnaakstur en þvagsýni sýndi mikinn eiturlyfjakokkteil. Var maðurinn undir áhrifum amfetamíns, kókaíns og MDMA.