Gervihnöttur írana fór aldrei á loft

Tilraun Írana um helgina til að skjóta á loft gervihnetti misheppnaðist algjörlega og stóðst engan veginn væntingar. Þetta hefur fréttastofa Reuters eftir opinberum bandarískum starfsmönnum, sem ekki vilja láta nafns síns getið. Heimildamaðurinn segir að skömmu eftir flugtak hafi hnötturinn hrapað, og því aldrei komist á sporbaug um jörðu.

Íranar sögðust á sunnudag hafa skotið gervihnettinum upp, með tækni sem einnig væri hægt að nýta til að skjóta á loft vopnum. Íran hefur átt í deilum við vesturlönd vegna áforma sinna um að framleiða kjarnorku. Bandaríkjamenn óttast að ætlun Írana sé að framleiða kjarnavopn, nokkuð sem þeir þverneita fyrir.