Þýddi PETA-skiltin yfir á íslensku

Nærvera dýraverndunarsamtakanna PETA hér á landi vakti mikla athygli í gær. PETA hafa verið áberandi úti í heimi við að vekja athygli á notkun dýrafelds í klæðnað en þetta er í fyrsta skipti sem þau mæta til Íslands. Blaðamenn voru að sögn viðstaddra óvenju stundvísir og óvenju margir á blaðamannafundinum enda hafa íslenskir mótmælendur á Austurvelli verið kappklæddir. Mótmælendurnir frá PETA voru hins vegar fáklæddir, skýldu sér með lopahúfum, lopavettlingum og mótmælaskiltum.

Lilja Björk Haraldsdóttir er einn fárra Íslendinga sem er virkur meðlimur í samtökunum. Hún hefur þó enn ekki farið og mótmælt á vegum PETA. Hana hafi þó lengi langað að fara á nautahlaupið í Pamplona þar sem PETA hefur framkvæmt gjörninga á ári hverju. „Hver veit nema þessi heimsókn verði til þess að maður drífi sig bara og láti til sín taka á þessu sviði,“ segir Lilja sem átti jafnframt heiðurinn að því að hafa þýtt mótmælendaspjöldin sem konurnar báru í dag.

Fréttablaðið hafði samband við Eggert feldskera og innti hann eftir því hvort fáklæddir mótmælendur hefðu komið í heimsókn til hans. Eggert sagðist ekkert hafa orðið var við slíkt. „Ég hef annars ekkert út á þessi samtök að setja, í lýðræðisríki hafa allir rétt á sinni skoðun svo lengi sem þeir eru ekki að þröngva henni upp á aðra.“