Nýr Landsbanki tekur til starfa - Elín Sigfúsdóttir nýr bankastjóri

Elín Sigfúsdóttir, forstöðumaður fyrirtækjasviðs Landsbankans, hefur verið ráðin nýr bankastjóri hins nýja Landsbanka sem ríkið mun reka. Hann heitir Nýi Landsbankinn hf.

Í tilkynningu frá fjármálaráðuneytinu segir að sama dag og skilanefnd Fjármálaeftirlitsins hafi tekið yfir starfsemi bankans hafi ríkissjóður stofnað nýtt hlutafélag, Nýja Landsbanka Íslands hf. Var tekin ákvörðun um að ný bankinn tæi yfir hluta af eignum, réttindum og skyldum Landsbankans hf. og heyri innlendi hluti af starfsemi bankans frá þeim tíma því undir nýtt fyrirtæki og nýja stjórn.

Nýi bankinn mun reka öll útibú gamla Landsbankans á landinu, útlánastarfsemi og aðra hefðbundna bankastarfsemi. Áætlað er að heildarfjöldi starfsmanna hins nýja banka verði í kringum 1000 manns sem allir munu koma úr röðum núverandi starfsmanna Landsbankans.

Sem fyrr segir er Elín Sigfúsdóttir nýr bankastjóri en frramkvæmdastjórar eru: Anna Bjarney Sigurðardóttir á útibúasviði, Árni Þór Þorbjörnsson á fyrirtækjasviði, Jón Þorsteinn Oddleifsson á fjármálasviði, Stefán Héðinn Stefánssson á eignastýringarsviði,Guðmundur Guðmundsson á rekstrarsviði, Gunnar Viðar á lögfræðisviði og Atli Atlason á starfsmannasviði. Yfir áhættustýringu bankans verður Þórir Örn Ingólfsson. Framkvæmdastjórn bankans mun kynna nýtt skipurit og umfang þeirrar starfsemi sem um ræðir við starfsfólk bankans í dag og næstu daga.

„Engin breyting verður á hefðbundnum viðskiptum milli bankans og viðskiptavina hans. Útibú bankans munu starfa óbreytt og engin breyting verður á opnunartíma þeirra. Þjónusta við einstaklinga og fyrirtæki verður sú sama og notkun greiðslukorta verður með hefðbundnum hætti. Sömu inn- og útlánsreikningar verða í hinum nýja banka eins og áður var. Netbanki og hraðbankar starfa í óbreyttri mynd," segir fjármálaráðuneytið.