Álit mannréttindanefndar SÞ ótengt framboði til öryggisráðs

Ingibjörg Sólrún Gíslasdóttir utanríkisráðherra segir nýtt álit mannréttindandnefndar Sameinuðu þjóðanna í máli tveggja sjómanna sem fóru kvótalausir á verðar ótengt framboði Íslands til Öryuggisráðs Sameinuðu þjóðanna. Þetta kom fram í máli hennar í utandagskrárumræðu um framboðið.

Kristinn H. Gunnarsson, þingflokksformaður Frjálslynda flokksins, benti á að Íslendingar hefðu í fjögur ár stefnt að því að taka sæti í öryggisráðinu á árunum 2009 og 2010 og kosið yrði í ráðið í haust. Sagði hann að opinberlega hefðu íslensk stjórnvöld lagt áherslu á virðingu fyrir mannréttindum og grundvallarreglum þjóðarréttar.

Utanríkisráðherra hefði greint frá því að hann tæki álit mannréttindanefndar SÞ í máli sjómannanna alvarlega og hann fagnaði því og byggist við að ráðherra og flokkur hans beitti sér fyrir lagabreytingum í tengslum við fiskveiðikerfið. Hins vegar hefðu yfirlýsingar sjávarútvegsráðherra og forsætisráðherra þess efnis að álitið kallaði ekki á lagabreytingar vakið efasemdir um það hvað ríkisstjórnin hygðist gera í málinu og hvort nokkuð yrði gert.

Spurði hann utanríkisráðherra hvort aðgerðaleysi yrði til þess að auka virðingu Íslands á alþjóðavettvangi og taldi sjálfur að trúverðugleiki framboðsins til öryggisráðsins væri í húfi ef ekkert væri gert varðandi álit SÞ.

Ingibjörg Sólrún Gísladóttir utanríkisráðherra sagði Norðurlöndin starfa saman að framboði Íslands til öryggisráðsins. Þá sagði hún að í nútímanum væru mannréttindi heima og í heiminum öllum eitt og sama verkefnið og hún hefði rætt persónulega við 23 starfssystkina sinna í Afríku sem litu til Íslands sem fyrirmyndar.

Þá sagði utanríkisráðherra að mannréttindanefnd SÞ starfaði á grundvelli samnings SÞ um borgaraleg réttindi. Hins vegar væri hlutverk öryggisráðsins að fjalla um frið og öryggi í heiminum og því væri ekki rétt að tengja saman framboðið og álit mannréttindanefndar SÞ.

Íslensk stjórnvöld bæru virðingu fyrir Sameinuðu þjóðunum og stofnunum þeirra en það væri ótengt því hvort Íslendingar væru í framboði til öryggisráðsins.