Þrír í gæsluvarðhald vegna fíkniefnasmygls

Þrír karlmenn á aldrinum 17 til 28 ára hafa verið úrskurðaðir í gæsluvarðhald til 14. október næstkomandi að kröfu fíkniefnadeildar lögreglunnar á höfuðborgarsvæðinu.

Fram kemur í tilkynningu lögreglunnar að mennirnir hafi verið úrskurðaðir í gæsluvarðhald vegna máls sem kom upp í lok síðustu viku þegar tollyfirvöld fundu ætluð fíkniefni, amfetamín og kannabisefni, í sendingu sem kom til landsins frá Póllandi.

Við afhendingu sendingarinnar handtók lögreglan mennina. Rannsókn er á frumstigi og verða veittar frekari upplýsingar síðar.