Breytingarnar á bankanum gerðar í góðri sátt

Halldór J. Kristjánsson, annar bankastjóra Landsbanka Íslands, segir að breytingarnar sem hafi verið gerðar á stjórn bankans í morgun séu gerðar í góðu samstarfi við stjórn bankans og bankaráð. Bankinn tilkynnti í morgun að Fjármálaeftirlitið hefði ákveðið að taka yfir vald hluthafafundar Landsbankans og víkja bankaráði þess frá störfum þegar í stað. Skilanefnd á vegum Fjármálaeftirlitsins stjórnar nú bankanum í samræmi við nýsamþykkt lög.

„Þetta er gert í góðu samstarfi við bankaráð bankans og stjórnendur hans," segir Halldór í samtali við Vísi. Hann tekur skýrt fram að breytingin sé gerð til þess að auka öryggi innistæðueigenda bankans. Allt yrði gert til þess að tryggja öryggi innistæðueigenda, eins og forsætisráðherra hafi sagt í gær.

Halldór segir að skilanefndin hafi farið þess á leit við sig og Sigurjón að sitja áfram sem bankastjórar og þeim sé bæði ljúft og skylt að gera það. Þeir muni því halda áfram að tryggja daglegan rekstur bankans.

Aðspurður um áhrif breytinganna á hluthafa bankans sagði Halldór að það ætti eftir að koma í ljós.