Chavez fagnar komu rússneskra sprengjuflugvéla

Langdrægar rússneskar sprengjuflugvélar taka nú í fyrsta sinn, síðan kalda stríðinu lauk, þátt í heræfingum í Vesturheimi. Vélarnar fóru framhjá Íslandi í gær og fóru bandarískar orrustuþotur til móts við þær, en þær eru nú staddar hér á landi við æfingar. Hugo Chavez, forseti Venesúela, segir að rússnesku sprengjuflugvélarnar séu nú komnar þangað.

Hugo Chavez forseti Venesúela réð sér vart fyrir kæti þegar hann tilkynnti að tvær langdrægar rússneskar sprengjuflugvélar væru komnar til landsins og að hann ætlaði að fljúga með einni þeirra.

Fyrir nokkrum dögum kvartaði Medvedev, forseti Rússlands, undan veru bandarísks flota í Svartahafinu og minnti á að Rússar gætu svarað í sömu mynt. Það virðast þeir nú hafa gert. TU-160 sprengjuflugvélarnar fóru í framleiðslu um það bil sem kalda stríðinu lauk. Með vaxandi olíuauði Rússa, hafa flugmenn þeirra hins vegar fengið ný verkefni, meðal annars það að fljúga meðfram ströndum Íslands.

Vera þeirra á æfingum svo nærri Bandaríkjunum á vafalaust eftir að valda pirringi í Washington. Og það finnst Chavez ekkert verra. Hann segist vera að æfa sig í flughermi til þess að geta sjálfur setið við stýri þotunnar. Hann veit líka hvert hann ætlar, því hann leit í myndavélina og sagði við vin sinn á Kúbu: Fídel, ég ætla að fljúga lágflug framhjá þér.