Nekt danska umferðarráðsins mest skoðuð á netinu

Nekt selur og netið er öflugur miðill. Þessar staðreyndir sönnuðust enn á ný í herferð danska umferðaröryggisráðsins (RFFS) í nóvember sl, þar sem notast var við nútímalegar en jafnframt djarfar aðferðir til að ná niður ökuhraða á dönskum vegum. Markmiðið var að ná til þeirra ökumanna sem mestum skaða valda með hraðakstri: ungra karlkyns bílstjóra. Útbúið var myndskeið með berbrjósta hraðaeftirlitsmönnum og sett í sjálfvirka dreifingu á netinu. Aðferðin nefnist viral marketing, sem nefnd hefur verið orðsporsherferð, veirudreifing eða smitherferð á íslensku. Aðgerðin heppnaðist með miklum ágætum, myndskeiðið "Speed Bandits" er orðið mest smitandi videóið á netinu samkvæmt upplýsingum nettímaritins "Contagious", sem fylgist með þessari þróun. Samkvæmt tímaritinu hafa 6,5 milljónir manna skoðað myndskeiðið.

Þetta er mun betri árangur en starfsmenn umferðaröryggisráðsins höfðu gert ráð fyrir í sínum villtustustu draumum. Ein milljón manna í 180 löndum horfði á myndskeiðið strax fyrstu vikuna. Í sjálfu Vatíkaninu létu menn fresistast til að skoða myndbandið 52 sinnum, að sögn Julie Paulli Budtz, verkefnisstjóra hjá RFFS. Könnun sem gerð var mánuði eftrir að myndskeiðið fór í dreifingu leiddi í ljós að 30% markhópsins hafði leitt hugann að eigin hraðakstri eftir að hafa horft á myndskeiðið.

Sjáið myndskeið danska umferðaröryggisráðsins hér