Vilja lög til að tryggja stöðu Íbúðalánasjóðs fyrir þinglok

Félag fasteignasala skorar á stjórnvöld og alþingismenn að leggja fram frumvarp varðandi framtíð Íbúðalánasjóðs og afgreiða það fyrir þinglok með þeim hætti að rennt verði styrkum stoðum undir starfsemi hans og honum verði gert kleift að starfa áfram á íbúðalánamarkaði í formi heildsölubanka í ljósi þess að ríkisábyrgð verður felld niður.

Þetta kemur fram í tilkynningu sem send hefur verið fjölmiðlum. Segir félagið að húsnæðismál séu einn af hornsteinum þjóðfélagsins og að það vilji ekki sjá að hálfrar aldar starfsemi fari forgörðum í pólitísku ölduróti. Gera þurfi sjóðnum kleift að þjóna íbúðamarkaði eins og hann hafi gert óháð búsetu og félagslegri stöðu.