Sterkt samband milli ofbeldisverka og steranotkunar

Rannsóknir á Norðurlöndum sýna að að sterkt samband sé á milli ofbeldisverka og steranotkunar. Eru dæmi um mjög gróft ofbeldi og kemur það helst fram í mjög alvarlegu heimilisofbeldi.

Samkvæmt upplýsingum frá Lyfjaráði ÍSÍ hefur engin áberandi aukning orðið á steranotkun meðal íslensks íþróttafólks á síðustu árum. Á þessu ári verða framkvæmd um 170 til 175 lyfjapróf í reglubundnu eftirliti í fjölmennustu íþróttagreinunum.

Í lyfjaprófum á íþróttafólki er sérstaklega skimað eftir steranotkun og öðrum örvandi efnum. Samkvæmt upplýsingum frá Skúla Skúlasyni, lyfjafræðingi sem situr í Lyfjaráði hafa rannsóknir og fréttir frá Norðurlöndum sýnt að fylgifiskur óhóflegrar steranotkunar er ofbeldishneigð og árásarhneigð og að sterkt samband sé á milli ofbeldisverknaðar og steranotkunar.

Í nágrannalöndum okkar eru helstu ofbeldisverkin sem tengjast steranotkun gróft heimilisofbeldi. Þegar um er að ræða ofbeldismál hér á landi skoðar lögregla ekki sérstaklega hvort um steranotkun sé um að ræða. Tveir íshokkímenn féllu í lok síðasta árs í reglubundnu eftirliti, en árið þar áður var sundmaður uppvís að steranotkun í reglubundnu eftirliti. Þess má geta að kraftlyftingamenn eru ekki innan vébanda ÍSÍ og því ekki teknir í reglubundið lyfjaeftirlit.