Búa sig undir erfiða nótt

Lögreglan í Kaupmannahöfn býr sig nú undir erfiða nótt. Viðbúnaður er í hámarki þar sem fjölmenn mótmæli hófust klukkan níu í kvöld að íslenskum tíma. Búist er við því að mesti óróleikinn verði mestur á Nörrebro. Lögregla hefur talsverðar áhyggjur af því að ástandið gæti orðið eins og það var í París árið 2005 en þá kveiktu ungmenni í borginni í bílum og gengu berserksgang um fjölmörg hverfi borgarinnar.

Mótmælendurnir eru nú á leið frá Gammeltorv til Skt. Hans Torv og ætla sér að hittast þar um miðnætti. ÞEir höfðu hist fyrr í kvöld í Folkets Hus og ráðfært sig um hvað þeir ætluðu að gera næst.

Lögregla hefur kallað út aukalið og fengið lánaða 20 brynvarða bíla frá lögreglunni í Svíþjóð til þess að nota í kvöld. Lögreglan hefur líka eftirlit með því hvort að fólk sé að koma erlendis frá til þess að taka þátt í mótmælunum. Fylgst er með lestar- og flugferðum og því hverjir koma til landsins. Lögreglan segir að ástandið sé eldfimt og að lítið þurfi til þess að það verði erfitt.