Vilja leggja nýjan Kjalveg með einkaframkvæmd

Félagið Norðurvegur vill hefja lagningu nýs vegar yfir Kjöl í einkaframkvæmd og áætlar að kostnaður við framkvæmdina verði um 4,2 milljarðar króna.

Á blaðamannafundi í dag á vegum félagsins var hugmyndin kynnt en samkvæmt nýrri skýrslu sem Rannsóknarstofnun Háskólans á Akureyri hefur gert fyrir Norðurveg mun vegalengdin milli Akureyrar og Reykjavíkur styttast um nærri 50 kílómetra með hinum nýja vegi. Þá mun vegalengdin frá Selfossi til Akureyrar styttast um rúma 140 kílómetra.

Gert er ráð fyrir að vegurinn verði 8,5 metra breiður og upphækkaður um tvo til þrjá metra yfir nánasta umhverfi. Benda frumathuganir á veðurskilyrðum til þess að veðurfar sé sambærilegt við það sem gerist á Möðrudalsöræfum en rannsaka á það frekar á næstu mánuðum.

Gert er ráð fyrir að fólk greiði veggjald fyrir að aka veginn, tvö þúsund krónur á ferð fyrir fólksbíl og átta þúsund fyrir þungaflutninga. Er talið að framkvæmdin geti borgað sig upp á 16 til 18 árum.

Hluthafar í Norðurvegi eru nú þegar um 20 talsins og er um að ræða einstaklinga, fyrirtæki og sveitarfélög bæði á Norður- og Suðurlandi. Stjórn félagsins skipa Halldór Jóhannsson, framkvæmdastjóri KEA, Jóhannes Jónsson í Bónus, Eiður Gunnlaugsson, framkvæmdastjóri Kjarnafæðis, Kjartan Ólafsson, þingmaður Sjálfstæðisflokksins í Suðurkjördæmi, og Gunnar Þorgeirsson, formaður Sambands sveitarfélaga á Suðurlandi.