Skógrækt ríkisins kærir framkvæmdir í Heiðmörk

Skógrækt ríkisins hefur kært framkvæmdir í Heiðmörk á vegum Kópavogsbæjar vegna fyrirhugaðrar lagningar á vatnslögn. Fram kemur á heimasíðu Skógræktarinnar að forsendur kærunnar séu þær að umræddar framkvæmdir séu brot á 6. og 7 gr. skógræktarlaga þar sem m.a. segi að ekkert svæði megi rjóðurfella nema með samþykki skógræktarstjóra, og þá því aðeins að sá sem heggur skuldbindi sig til þess að græða upp skóg að nýju á öðru jafn stóru svæði og bannað er að stinga upp og flytja brott tré og hvers konar ungviði á leyfis skógrlktarstjóra eða skógarvarða. Samþykki skógræktarstjóra liggur ekki fyrir í þessu tilviki.

Þar segir enn fremur að í nútímastjórnsýslu sé eðlilegt að samráð sé haft við Skógrækt ríkisins á skipulagsstigi fyrir framkvæmdir sem hafa í för með sér skógareyðingu, að mótvægisaðgerðir í formi áætlunar um að græða upp skóg að nýju á öðru jafn stóru svæði séu hluti af viðkomandi skipulagsáætlun og að samþykki skógræktarstjóra sé fengið strax og þær áætlanir liggja fyrir. Hvorki Kópavogsbær né Reykjavíkurborg hafi haft fyrir því að leita samþykkis skógræktarstjóra á skipulagsstigi vatnsveitulagnarinnar í Heiðmörk.

Skógrækt ríkisins segir ljóst að á komandi árum muni æ fleiri mál af þessu tagi koma upp þegar byggð á höfuðborgarsvæðinu og víðar stækkar inn í skógræktarsvæði í nágrenni sínu. Mikilvægt sé að þessi skógræktarsvæði nýtist íbúum nýju hverfanna sem skjólgjafar, til fegrunar lands og til útivistar en séu ekki rudd burt af því það hentar betur stórvirkum vinnuvélum.