Segist hafa tapað þúsundum dollara

Scott Hjorleifsson, Vestur-Íslendingurinn sem stendur á bak við netsíðuna sleazydream.com og ætlaði að koma hingað til lands í fyrirhugaða ferð klámframleiðenda, hefur sent frá sér yfirlýsingu vegna þess að hætt hefur verið við ferðina.

Þar segist hann hafa hlakkað til þess allt sitt líf að heimsækja land forfeðranna en komist að því að þangað sé hann ekki velkominn. Svo virðist sem ný lög hafi verið sett Íslandi sem feli í sér að þeir sem tengist fullorðinsefni á einhvern hátt séu óvelkomnir til landsins. Segist hann hafa lagt út þúsundir dollara í ferðina og fái flugmiðann ekki endurgreiddan.

Þá segir Hjorleifsson að Stígamót hafi lýst því yfir að klám sé vændi í kvikmyndum sem þýði væntanlega þeir leikarar í Hollywood sem tekið hafi þátt í nektar- og kynlífssenum séu hórur.

Þá þýði þetta væntanlega að hver sá sem eigi viðskipti við fyrirtæki á Netinu eins og Google, Microsoft, Visa, Mastercard og fleiri geti hætt öllum viðskipum á Íslandi þar sem öll tengsl við fullorðnisefni séu litin hornauga á Íslandi.