Segir kosið um stóriðjustefnu ríkisstjórnar í Hafnarfirði

Jón Baldvin Hannibalsson sagði á fjölmennum fundi í Bæjarbíói í Hafnarfirði í gær að hann teldi að kosið yrði um stóriðjustefnu ríkisstjórnarinnar í kosningum um stækkun álversins í Straumsvík í lok mars.

Jón Baldvin sagði að stækkunin yrði hvernig sem úrslitin færu eitt helsta kosningamálið í vor. Auk Jóns Baldvins voru Þórunn Sveinbjarnardóttir alþingismaður og Tryggvi Harðarson, fyrrverandi bæjarfulltrúi, frummælendur á fundinum sem haldinn var í Bæjarbíó í gærkvöldi.

Það var flokksbundið Samfylkingarfólk sem er andvígt stækkun sem boðaði til fundarins en frummælendur voru allir andvígir því að ráðist yrði í stækkun nú. Allir frummælendur töldu að íslenskt hagkerfi væri þanið til hins ítrasta og þyldi ekki frekari stóriðjuframkvæmdir.

Tryggvi Harðarson sagðist fylgjandi stækkun þó ekki væri tímabært að bæta í stóriðjuna nú. Þórunn Sveinbjarnardóttir sagðist telja að úrslit íbúakosningar gætu haft áhrif á úrslit þingkosninga í kjördæminu hvernig svo sem þau yrðu.