Árni Johnsen hefur enga aðkomu að samgöngum milli Eyja og lands

Árni Johnsen hefur enga aðkomu að samgöngumálum milli Vestamannaeyja og lands eins og staðan er nú, segir Sturla Böðvarsson samgöngumálaráðherra. Hann segir að sérstaka samþykkt þurfi hjá Alþingi til að ráðast í rannsóknir á hagkvæmni jarðganga milli lands og Eyja.

Árni Johnsen lýsti því yfir í fréttum Stöðvar 2 í gærkvöldi að fáránlegt væri að ráðast í gerð ferjuhafnar á Bakkafjöru án þess að kanna kostnað við jarðgangagerð til Vestmannaeyja. Gerð ferjuhafnarinnar á að hefjast á næsta ári og gert er ráð fyrir því að framkvæmdirnar og ný ferja kosti ríkið um fimm milljarða króna. Árni hefur barist hvað mest fyrir jarðgöngum til Eyja og fengið til liðs við sig fjársterka Eyjamenn.

Þegar Fréttastofa leitaði viðbragða hjá flokksbróður Árna, Sturlu Böðvarssyni samgöngumálaráðherra, áréttaði ráðherra að ríkisstjórnin vilji fylgja þeirri línu að fullkanna hvort hægt sé að byggja höfnina við Bakkafjöru og minnir á að ríkisstjórnin hafi samþykkt tillögu hans um að leggja til fé í rannsóknir á hafnarstæðinu við Bakkafjöru. Alþingi hafi samþykkt þessa tillögu og að 200 milljónir verði veittar í undirbúnings- og rannsóknarvinnu. Til að breyta ferlinu þurfi sérstaka samþykkt hjá Alþingi. Sturla minnir á að tillögur sínar um að leggja þunga á Bakkafjöruhöfn sem lausn í samgöngum milli lands og Eyja byggi hann á skýrslu sem unninn var á síðasta ári af nefnd undir stjórn Páls Sigurjónssonar, verkfræðings. Nefndin hafi komist að þeirri niðurstöðu að ekki sé álitlegt að byggja jarðgöng til Vestmannaeyja. Það sé ekki einu sinni næsti kostur á eftir hafnargerð í Bakkafjöru.