Jens Martin og félagar Færeyjameistarar

Nes Sóknar Ítróttarfelag, NSÍ, varð í dag Færeyjarmeistari í knattspyrnu í fyrsta sinn í 50 ára sögu félagsins.

Markvörður liðsins og þjálfari, Jens Martin Knudsen, er mörgum kunnugur þar sem hann lék með Leiftri á Ólafsfirði um aldamótin og starfaði um tíma sem þjálfari liðsins.

NSÍ vann í dag 3-1 sigur á VB/Sumba og tryggði sér þar með titilinn þó svo að ein umferð sé eftir af deildinni.

Deildarkeppninni lýkur um næstu helgi en í deildinni eru tíu lið sem spila þrefalda umferð.  

Óráðið er hvaða lið lendir í öðru sæti en B36 og EB/Streymur berjast á þeim vettvangi.