Dagskrárstjóri RÚV: Björgólfur ekki að styrkja RÚV

Þórhallur Gunnarsson, dagskrárstjóri Ríkissjónvarpsins, segir að samningur Björgólfs og RÚV sem undirritaður var á föstudaginn sé fyrst og fremst stuðningur við framleiðendur leikins innlends dagskrárefnis.

Þórhallur segir að það sé rangt að halda því fram að með samningnum sé Björgólfur að styrkja RÚV. „Það hefur lengi verið baráttumál framleiðenda íslensks sjónvarpsefnis að fá aukið fjármagn inn í greinina. Þetta er tímamótasamningur að því leyti að þetta er í fyrsta skipti sem RÚV eyrnamerkir 150 milljónir í leikið sjónvarpsefni," segir Þóhallur og leggur áherslu á að Björgólfur hafi viljað koma að samningnum af því að hann treysti því að fjármagnið renni til sjálfstæðra framleiðanda, en renni ekki til Ríkissjónvarpsins.

Þórhallur segir að þrátt fyrir að allt það efni sem framleitt verður vegna þessa samnings verði sýnt á RÚV muni fjölmargir framleiðendur njóta góðs af því. „Það er ljóst að einn þessa aðila verður Saga Film, sem er í eigu 365 miðla," segir Þórhallur.