Grétar Rafn framlengir við AZ

Landsliðsmaðurinn Grétar Rafn Steinsson hefur framlengt samning sinn við hollenska félagið AZ Alkmaar til ársins 2012. Þetta kemur fram á heimasíðu félagsins í dag. Gamli samningurinn átti að renna út árið 2011 og því er hér um eins árs framlengingu að ræða.

"Mér líður eins og heima hjá mér hjá félaginu og því sé ég ekki ástæðu til að fara héðan," sagði Grétar í viðtali á síðu félagsins. Hann hefur verið orðaður við fjölda liða á undanförnum misserum - þar á meðal Middlesbrough á Englandi.

"Louis van Gaal sýndi mér traust og gaf mér tækifæri til að sanna mig hjá félaginu og þess vegna hef ég náð að bæta mig mikið. Ég vil vera lykilmaður í liðinu og ég á enn eftir að sýna stuðningsmönnum hvað í mér býr. Það var gaman að heyra af áhuga annara liða í sumar, en ég var þegar búinn að ákveða að vera áfram hérna hjá AZ. Mig langar að spila á Englandi einn daginn, en fyrst vil ég bæta mig eins og ég get hérna," sagði Grétar.