Vopn og fíkniefni fundust hjá Fáfnismönnum

Samkvæmt heimildum Vísis lagði lögreglan hald á tölvur, vopn og fíkniefni í húsleit sinni hjá mótorhjólaklúbbi Fáfnis í dag. Húsleitin tengist rannsókn á fíkniefnamáli en lögreglan á Suðurnesjum verst allra frétta af málinu.

Ekki náðist í Jóhann R. Benediktsson lögreglustjóra á Suðurnesjum en Hörður Jóhannesson hjá lögreglunni í Reykjavík staðfesti við Vísi að húsleitin tengdist fíkniefnamáli.

„Lögreglan á Suðurnesjum fékk úrskurð um húsleit og við vorum bara að aðstoða þá, ég veit ekkert meira, " sagði Hörður Jóhannesson um málið.

Vísir hefur heimildir fyrir því að von sé á komu nokkurra meðlima Hells Angels hingað til lands um helgina. Í kvöldfréttum Sjónvarpsins kom fram að samtökin héldu upp á 11 ára afmæli um þessar mundir og von væri á 18 meðlimum Hells Angesl samtakanna tengdu því.

Einnig kom fram að mikill viðbúnaður væri í Leifsstöð af þessum sökum og meðal annars yrðu allir tollverðir stöðvarinnar á vakt nú um helgina. Flugstöðinni væri nánast haldið í herkví.

Enn fremur hefur Vísir heimildir fyrir því að lögreglan hér á landi hafi fengið vísbendingar frá kollegum sínum í Danmörku um að Fáfnir hafi áætlanir um og hafi í langan tíma reynt að verða viðurkennd samtök innan Hells Angels, en þær áætlanir séu ekki gengnar í gegn.

Hells Angels eru talin ein hættulegustu glæpasamtök á norðurlöndum. Ef áform Fáfnismanna um að gerast viðurkenndir meðlimir Hells Angels ganga í gegn er komin upp sú staða að alþjóðleg glæpasamtök eru komin með útibú hér á landi.

„Þetta er bölvuð vitleysa, þeir fá ekki einu sinni að koma hingað til lands. Ég segi nú bara eins og Ólafur í næturvaktinni; þurfum við eitthvað að ræða þetta," sagði Sverrir Þór Einarsson einn meðlima klúbbsins í samtali við Vísi aðspurður um komu Hells Angels manna.

Hann sagði engin áform um að þessir menn væru á leið til landsins en sagði kristilegan arm samtakanna ætla að hittast um helgina og biðja saman. „Við ætlum að biðja fyrir veikum og sjúkum."

Upptöku af því þegar Víkingasveitin réðst inn í klúbbhúsið má sjá hér að neðan.