Frakkar tóku toppsætið af Íslendingum

Frakkland er komið á topp 3. riðils í undankeppni EM 2009 eftir sigur á Slóveníu í gær, 2-0.

Ísland tapaði óvænt í Slóveníu fyrr í haust, 2-1, en það var fyrsti tapleikur Íslands í riðlinum.

Frakkar áttu sömuleiðis í vandræðum með Slóvena en tvö síðbúin mörk tryggðu þeim sigur. Elise Bussaglia skoraði fyrra mark Frakka en varamaðurinn Elodie Thomis bætti við öðru undir lok leiksins.

Ísland vann Frakkland á Laugardalsvelli í haust en Frakkar eru nú komnir á topp riðilsins með tólf stig eftir fimm leiki. Ísland er í öðru sæti með níu stig eftir fjóra leiki.

Frakkar fóru létt með Sereba um helgina, 8-0.

Ísland á fjóra leiki eftir í riðlinum og Frakkar þrjá. Liðin mætast svo í lokaleik beggja liða þann 27. september næstkomandi í Frakklandi.

Ef bæði lið vinna sína leiki fram að því verður um hreinan úrslitaleik að ræða um hvort lið kemst beint í úrslitakeppnina í Finnlandi árið 2009 og hvort þarf að taka þátt í umspili.

Leikir Íslands:

28. maí 2008: Serbía - Ísland

21. júní 2008: Ísland - Slóvenía

26. júní 2008: Ísland - Grikkland

27. september 2008: Frakkland - Ísland

Leikir Frakklands:

23. apríl 2008: Grikkland - Frakkland

8. maí 2008: Frakkland - Serbía

27. september 2008: Frakkland - Ísland

Staðan í riðlinum:

1. Frakkland 12 stig (5 leikir, +21 í markatölu)



2. Ísland 9 (4, +8)

3. Grikkland 3 (3, -8)

4. Serbía 3 (4, -9)

5. Slóvenía 3 (4, -12)