Tímabilið búið hjá Beckham

David Beckham kom inn sem varamaður í nótt þegar lið hans LA Galaxy tapaði 1-0 fyrir Chicago Fire í MLS deildinni. Markið kom í uppbótartíma og tapið þýðir að Galaxy kemst ekki í úrslitakeppnina og því er fremur tilþrifalítilli leiktíð Beckham lokið.

Það skondna við leikinn í nótt var það að það var fyrrum félagi Beckham í unglingaliði Manchester United, John Thorrington, sem skoraði sigurmarki. Thornton reyndi að komast í lið LA Galaxy fyrr í sumar, en þegar það tókst ekki skrifaði hann undir hjá Chicago liðinu.

"Ég spilaði sömu stöðu og Beckham hjá unglingaliðinu og varaliðinu hjá United og það var skondið að vera á vellinum með honum í dag," sagði Thorrington ánægður eftir leikinn.

"Það var eiginlega byrjunin á tímabilinu sem kostaði okkur og fyrir utan þennan leik held ég að við höfum eitthvað til að byggja á fyrir næsta tímabil," sagði Beckham.

Hann hefur ekki komið mikið við sögu hjá Galaxy vegna meiðsla, en er samt búinn að raka inn rúmlega 6,5 milljónir punda í tekjur fyrir leikina eina og sér.