Elísabet: Langar helst til að gráta

Elísabet Gunnarsdóttir, þjálfari Vals, var heldur betur svekkt með úrslit sinna manna gegn Frankfurt í Evrópukeppni félagsliða í dag.

„Mig langar helst til að gráta," sagði Elísabet. „Við komumst yfir og spiluðum óaðfinnanlega í áttatíu mínútur. Við áttum bara ekki meira til."

Margrét Lára Viðarsdóttir kom Val yfir í fyrri hálfleik en Birgit Prinz jafnaði fyrir Frankfurt þegar tíu mínútur voru til leiksloka. Petra Wimbersky bætti tveimur við á lokamínútum leiksins, þegar Valsmenn freistuðu þess að sækja.

„Við ætluðum okkur alltaf að vinna þennan leik og lögðum ekki upp með neitt annað í okkar undirbúningi. Við höfðum þvílíka trú á því að við gætum gert það," sagði Elísabet ákveðin.

„En við erum að klára tímabilið og kappkosta við að halda öllum leikmönnum í toppformi svona lengi sem er afar erfitt gegn svo sterku liði."

Í stöðunni 1-1 var mark dæmt af sem Valur skoraði vegna rangstöðu. Elísabet vildi meina að um rangan dóm hefði verið að ræða.

„Við ætluðum okkur að vinna og það er ótrúlega sorglegt að við fengum ekkert úr þessu. En ég er rosalega ánægð með liðið, úrslitin eru bara ekki samkvæmt frammistöðunni - við spiluðum stórkostlega."

Valur mætir næst heimamönnum í Wezemaal á laugardaginn kemur og að síðustu Everton á þriðjudaginn. Þessi lið eigast við síðar í dag en ljóst er að Valur þarf helst að vinna þessi tvö lið til að komast áfram í fjórðungsúrslit keppninnar, væntanlega ásamt Frankfurt.

„Við ætlum að byrja á því að horfa á Wezemaal á laugardaginn," sagði Elísabet.