Línudómarar á HM félagsliða

FIFA tilkynnti í dag að tveir auka dómarar yrðu notaðir í tilraunaskini á HM félagsliða sem fram fer í Japan í desember. Þar verður einnig prófaður tæknibúnaður sem sker úr um hvort boltinn fer yfir marklínu eða ekki.

Michel Platini forseti Uefa hefur verið einn talsmanna þess að fjölga dómurum um tvo, þar sem þeim verði gert að standa við mörkin og skera úr um þessi frægu vafaatriði í knattspyrnunni.

HM félagsliða er árleg keppni meistaraliða frá öllum álfum heimsins og AC Milan frá Ítalíu, Boca Juniors frá Argentínu, Pachuca frá Mexíkó og Waitakere United frá Nýja-Sjálandi hafa þegar boðað komu sína á mótið. Sjö lið munu etja kappi á mótinu.