Bikarinn verður á Kaplakrika

Þórir Hákonarson, framkvæmdarstjóri KSÍ, staðfestir að Íslandsmeistarabikarinn verði á Kaplakrika á sunnudaginn.

Þá mætast FH og Valur í „úrslitaleik sumarsins" á Kaplakrikavelli. Sigri FH-ingar í leiknum verður þeim afhentur bikarinn í fjórða skiptið á jafn mörgum árum.

„Það verður þannig að bikarinn verður afhentur sigurvegaranum þegar í ljós kemur hver það verður," sagði Þórir í samtali við Vísi.

Verði niðurstaðan í leiknum jafntefli eða að Valsmenn vinna verður nýr Íslandsmeistari krýndur annað hvort á Víkingsvelli eða Laugardalsvelli í lokaumferðinni sem fer fram laugardaginn 29. september.

Tvö stig skilja liðin að eins og staðan er í dag.

Leikur liðanna hefst klukkan 17 á sunnudaginn.