Margrét Lára: Svíþjóð heillar mest

Margrét Lára Viðarsdóttir segir að nýyfirstaðið tímabil hafi sennilega verið hennar síðasta með Val í bili. Hún stefnir á atvinnumennsku.

Hún var valin besti leikmaður Landsbankadeildar kvenna fyrir umferðir 13-18 í dag.

Reyndar er Valur ennþá með í Evrópukeppni félagsliða og mun Margrét Lára klára það verkefni með félaginu

Valur er í riðli með Frankfurt, Everton og Wezemal en leikir riðilsins fara fram í heimalandi síðastnefnda liðsins, Belgíu, dagana 11.-16. október.

"Nú hefst nýtt undirbúningstímabil með tilheyrandi hlaupum og teygjum. Það verður bara gaman," sagði Margrét Lára við Vísi.

Valur komst í fjórðungsúrslit keppninnar fyrir tveimur árum og tapaði þá fyrir einu sterkasta félagsliði Evrópu, Potsdam frá Þýskalandi.

"Við ætlum okkur að sjálfsögðu að komast áfram líka núna en það verður mjög erfitt verkefni. Við þurfum að sýna okkar allra besta til þess."

Hún segir að það markmið sé raunhæft fyrir Valsmenn. "Við höfum unnið okkur sæti í þessum millriðli leins og öll hin liðin og við eigum jafna möguleika á því að komast áfram."

Margrét Lára segir það líklegt að hún muni reyna atvinnumennskuna á nýjan leik eftir tímabilið. Hún samdi við þýska liðið Duisburg á svipuðum tíma í fyrra en hætti hjá félaginu skömmu eftir áramót.

"Ég mun taka mér gott frí þegar þetta er búið og skoða mína möguleika í rólegheitum. Maður skyldi aldrei segja aldrei um hvort þetta er síðasta tímabilið mitt með Val en ég set alla vega stefnuna út."

Það má heyra á henni að það heillar hana ekki að fara aftur til Þýskalands. "Svíþjóð heillar mig langmest í augnablikinu. Það getur líka vel verið að eitthvað annað spennandi komi upp líka."

Nýrri atvinnumannadeild hefur verið komið á fót í Bandaríkjunum en Margrét Lára segir að það sé ótímabært fyrir hana að fara þangað. "Ég held að það væri ágætt fyrir mig að hoppa ekki beint út í þá djúpu laug. Kanarnir eru enn að prófa sig áfram og ágætt að leyfa þeim að þróa þessa deild í nokkur ár enn. Svo er hægt að skoða þann möguleika síðar."

Sjá einnig: Margrét Lára valin best