Mikið í húfi fyrir KR og Val

Tólfta umferð Landsbankadeildar karla í knattspyrnu hefst í kvöld með sannkölluðum stórleik. Þá tekur KR á móti Val en gríðarlega mikið er í húfi fyrir bæði lið.

Valur er enn í toppbaráttunni og er fimm stigum á eftir toppliði FH. Nú þegar aðeins sjö umferðir eru eftir af deildinni verður hvert stig mikilvægara og því má hvorugt liðið við tapi né jafntefli í kvöld. KR vermir enn botnsæti deildarinnar og þar eru menn orðnir örvæntingafullir þegar svo skammt er eftir af mótinu. KR hefur ekki tapað í fjórum leikjum í röð en gert jafntefli í þremur síðustu leikjum sínum. Valsmenn töpuðu hins vegar óvænt og stórt fyrir Fylki í síðustu umferð. Willum Þór Þórsson þjálfari Vals segir vissulega erfitt að hafa þurft að dvelja svona lengi á þeim tapleik en liðin í Landsbankadeildinni hafa aðeins leikið einn leik á síðustu þremur vikum.

Leikur KR og Vals hefst kl. 19:15 og verður í beinni útsendingu á Sýn.