Gerrard: Við verðum að byrja vel í sumar

Steven Gerrard, fyrirliði Liverpool, segir að liðið verði að ná fljúgandi starti í ensku úrvalsdeildinni á næsta tímabili ef liðið ætli sér að vera með í baráttunni um titilinn. Metnaðurinn er mikill á Anfield í sumar og þar á bæ stefna menn á fyrsta titil liðsins síðan árið 1990.

"Ég hef heyrt menn segja að maður geti ekki unnið titilinn í fyrstu tíu umferðunum, en maður getur sannarlega misst af honum í fyrstu tíu umferðunum og sú hefur verið raunin með okkur," sagði Gerrard í samtali við Liverpool TV, en Liverpool hefur hafnað í þriðja sæti síðustu tvö tímabil en aldrei náð að ógna toppliðunum verulega.

"Á síðustu tveimur árum höfum við misst af lestinni í hendur Manchester United og Chelsea og það gerðist strax í fyrstu umferðunum. Við getum ekki leyft okkur að gefa þessum liðum svona gott forskot ef við ætlum að vera með í slagnum og við erum staðráðnir í að ná fljúgandi starti í ár," sagði fyrirliðinn.