Tveir leiðtogar á leið út funduðu í París

Tony Blair, forsætisráðherra Bretlands, kom til Frakklands í dag til að kveðja Jacques Chirac fráfarandi Frakklandsforseta og ræða við Nicolas Sarkozy, arftaka Chiracs. Vel virtist fara á með þeim Chirac og Blair í heimsókninni en Blair er eins Chirac á leið af valdastóli.

Blair og Chirac hafa marga hildina háð á síðustu árum, meðal annars í tengslum við stefnu Evrópusambandsins og vegna Íraksstríðsins. Þar voru Frakkar andsnúnir innrásinni en Bretar tóku hins vegar þátt í henni.

Blair fundaði einnig í dag með Sarkozy sem tekur við af Chirac eftir helgi. Sakozy hefur lengi verið aðdáandi Blairs og stjórnarhátta hans og hefur hann meðal annars heimsótt Bretland til þess að fræðast um hvernig Bretar hafa tekist á við atvinnuleysi.

Reiknað var með að Blair og Sarkozy myndu hins vegar fyrst og fremst ræða um Evrópusambandið, ekki síst stöðu stjórnarskrár sambandsins en Frakkar höfnuðu henni í þjóðaratkvæðagreiðslu fyrir tveimur árum.

Eftir því sem fram kemur á fréttavef BBC hefur Sarkozy uppi nýjar hugmyndir um stjórnarskrána. Han mun vilja einfaldari samning milli ESB-ríkjanna sem þjóðþingin samþykkja aðeins en ekki kjósendur í þjóðaratkvæðagreiðslu.