Þrengir að forsætisráðherra Ísraels

Enn þrengir að Ehud Olmert, forsætisráðherra Ísraels, vegna svartrar skýrslu rannsóknarnefndar um stríðsrekstur Ísraela gegn Hizbollah-liðum í Líbanon í fyrra. Nefndin átelur Olmert og Amir Peretz, varnarmálaráðherra, fyrir undirbúning og framkvæmd aðgerða.

Olmert hefur lýst því yfir að hann ætli ekki að segja af sér þrátt fyrir háværar kröfur um það. Í morgun bættist framkvæmdastjóri og einn stofnenda Kadima-flokks forsætisráðherrans í hóp þeirra sem krefjast afsagnar. Peretz íhugar hins vegar afsögn ef marka má ónafngreinda heimildarmenn Ísraelska útvarpsins úr innsta hring stjórnarinnar. Samkvæmt þeim gæti varnarmálaráðherrann ákveðið að taka pokann sinn þegar í dag.