Beckenbauer segir Þjóðverja með besta liðið

Franz Beckenbauer, keisarinn í þýskri knattspyrnu, segir að þýska landsliðið sé það besta í Evrópu um þessar mundir, miðað við spilamennsku þess í síðustu leikjum. Beckenbauer segir að þjálfarar ættu að nota síðustu leiki þýska liðsins sem kennslumyndband í fótbolta.

Lærisveinar Joachim Loew, sem tók við stjórn þýska liðsins af Jurgen Klinsmann eftir HM síðasta sumar, unnu frækinn 2-1 útisigur á Tékkum á laugardag og þótti liðið spila afar vel í leiknum. Beckenbauer segir að með sama áframhaldi verði ekki langt þar til þýska liðið hefur tryggt sér sæti í lokakeppni EM.

"Jafnvægið í liðinu er nánast fullkomið og leikmenn eru að vinna frábærlega saman. Það væri hægt að nota síðustu leiki liðsins sem kennslumyndband í fótbolta. Ég gæti haldið því skammarlaust fram að þýska liðið sé það besta í Evrópu á þessari stundu. Liðið er það eina sem hefur haldið dampi frá því á HM í sumar og er aðeins að spila betur, ef eitthvað er," segir Beckenbauer.