Olsen ósáttur við spænsku boltastrákana

Morten Olsen, landsliðsþjálfari Dana, var allt annað en sáttur með spænsku boltastrákana sem voru við störf á leiknum við Spánverja á Bernabeu-vellinum í Madríd í gær og sakar þá um að tefja leikinn vísvitandi á síðustu mínútum hans. Olsen hraunaði enn fremur yfir svissneskan dómara leiksins.

"Á síðustu 10 mínútum leiksins voru þeir ekki að flýta sér mikið að skila boltanum til leikmanna. Mér finnst alltaf jafn ömurlegt þegar ég horfi upp á svona framkomu, en hvað er hægt að gera?," sagði Olsen í sjónvarpsviðtali við TV2 eftir leikinn.

Olsen reifst mikið við svissneska dómarann Massimo Busacca í leiknum en sá var ekki sáttur með að Olsen steig út fyrir merkt svæði varamannabekkarins. "Það þarf að komast nálægt leikmönnum til að kalla til þeirra fyrir framan 80 þúsund öskrandi áhorfendur. Ég fór 5 sentímetrum fram yfir línuna og var húðskammaður en spænski þjálfarinn gerði það sama allan leikinn og fékk ekki einu sinni tiltal. Þetta var heimadómgæsla af versta tagi," sagði Olsen.