Spánverjar lögðu Dani

Spánverjar unnu 2-1 sigur á Dönum í undankeppni EM í kvöld og ættu því að mæta fullir sjálfstraust í viðureignina gegn Íslendingum á miðvikudagskvöld. Danir léku manni færri lengst af leiknum eftir að Niclas Jensen fékk að líta rauða spjaldið strax á 20. mínútu leiksins. Þá burstuðu Portúgalar heillum horfna Belga, 4-0.

Þetta var annar sigur Spánverja í undankeppninni en liðið er nú komið með sex stig eftir fjóra leiki, einu stigi minna en Danir hafa fengið. Norður-Írar hafa 10 stig í öðru sæti en hafa leikið fimm leiki. Svíar eru á toppnum með 12 stig, hafa unnið alla leiki sína, en Íslendingar eru í sjötta og næstneðsta sæti með þrjú stig í riðlinum.

Fernando Morientes kom Spánverjum yfir á 34. mínútu í kvöld og David Villa bætti við öðru marki á fyrstu mínútu síðari hálfleiks. Michael Gravgaard lagaði stöðuna á 49. mínútu en einum leikmanni færri náðu Danir ekki að pressa á Spánverja eins og þeir hefðu viljað.

Portúgalir, með Cristiano Ronaldo fremstan í flokki, áttu í litlum vandræðum með Belga á heimavelli sínum og unnu 4-0 sigur í A-riðli undankeppninnar. Ronaldo skoraði tvö marka Portúgals, en Nuno Gomes og Richardo Quaresma hin mörkin tvö. Mörkin komu öll í síðari hálfleik.

Pólverjar eru á toppi A-riðils eftir leiki dagsins með 13 stig, en fyrr í dag unnu þeir sannfærandi sigur á Azerbaijan, 5-0. Finnar eru í öðru sæti með 11 stig en Portúgalir og Serbar koma næstir með 10 stig.