Knattspyrnusambandið rannsakar slátrunarhótanir

Knattspyrnusamband Evrópu ætlar að taka til meðferðar ummæli belgíska landsliðsmarkvarðarins Stijn Stijnen í dag, en hann sagði landa sína ætla að slátra Portúgalanum Cristiano Ronaldo þegar liðin mætast í landsleik á laugardaginn.

Belgíska knattspyrnusambandið ritaði systursambandi sínu í Portúgal bréf þar sem fram var tekið að ummæli markvarðarins hefðu verið tekin úr samhengi í blaðinu Gazet Van Antwerpen. Með bréfinu fylgdi yfirlýsing frá markverðinum þar sem hann neitar að hafa sagt það sem eftir honum var haft.

Portúgalska knattspyrnusambandið segir samstarfið við það Belgíska til þessa hafa verið mjög gott og ætlar ekkert að gera í málinu - það sé í höndum Knattspyrnusambands Evrópu og afsakanir Belgíumanna láti málið ekki hverfa.