Siv hótar stjórnarslitum

Framsóknarmenn eru komnir saman til tveggja daga flokksþings á Hótel Sögu þar sem áherslur fyrir komandi kosningar eru mótaðar. Þegar kom að ræðu formanns fluttu þeir sig hins vegar yfir í Borgarleikhúsið. Jón Sigurðsson varði þar mestum tíma til að lýsa þeim árangri sem náðst hefur. Um samstarfsflokkinn í ríkisstjórn fór hann mildum orðum en minnti þó á að eitt væri ógert. Framsóknarmenn legðu ákaflega þunga áherslu á að staðið yrði við það ákvæði í samstarfssamningi ríkisstjórnarinnar sem kveður á um sameign þjóðarinnar á auðlindum. Siv Friðleifsdóttir gekk reyndar svo langt í umræðum síðdegis að hóta stjórnarslitum. Ef ekki næðist niðurstaða í málinu gæti myndast svo mikil gjá milli flokkana að samstarfið lifði það ekki af. Svo gæti samstarfið trosnað annaðhvort minnihlutastjórn eða starfsstjórn yrði að stjórna landinu fram til kosninga. Kvaðst hún þó vonast til að sjálfstæðismenn sæju að sér.

Jón Sigurðsson gagnrýndi annars stjórnarandstöðuna harðlega.Hann sagði andstæðingana skorta skilning á arðvænlegu atvinnu- og viðskiptalífi. Sumir þeirra væru farnir að tala um stöðvun á allri iðnþróun um eitthvert árabil. Hann varaði við slíkum hugmyndum, sagði þær leiða af sér stopp-start vitleysu í hagstjórn eða stopp-stopp, sem væri ennþá verra. Hann sagði þá ætla að bjóða til eyðsluveislu á kostnað almennings. Almenningur yrði að kynna sér eyðsluplön þeirra. Þeir virtust ætla að leggja ríkissjóð í rúst á mettíma.