Segir rökstuðning ráðherra fyrirslátt

Arna Schram, formaður Blaðamannfélags Íslands, segir rökstuðning menntamálaráðherra fyrir því að virða að vettugi tilnefningar félagsins í sérfræðingaráð Norræna blaðamannaskólans og skipa Ólaf Þ. Stephensen, aðstoðarritstjóra Morgunblaðsins, í ráðið, fyrirslátt.

Á vef Blaðamannafélagsins, press.is, segir að ráðherra hafi hafnað fulltrúa BÍ, Birgi Guðmundssyni, á þeirri forsendu að slíkt skapaði hagmunaárekstur þar sem hann væri háskólakennari við Háskólann á Akureyri. Til stæði að færa hluta af starfsemi Norræna blaðamannaháskólans til háskóla á Norðurlöndum og með því að hafa háskólamann í sérfræðinganefnd blaðamannaskólans gæti orðið hagsmunaárekstur.

Hins vegar kemur í ljós að Ólafur Stephensen er í þriggja manna stjórn meistaranáms í blaða- og fréttamennsku við Háskóla Íslands. Bent er á að annars staðar á Norðurlöndunum hafi verið farið að tilnefningum þarlendra blaðamannafélaga í sérfræðinganefndina.

„Þetta staðfestir að ekkert mark er takandi á rökum menntamálaráðherra fyrir því að hunsa tilnefningar BÍ í sérfræðinganefnd NJC. Skýringarnar voru eftirá skýringar, eins og við sögðum alltaf.. Aldrei var ætlunin að fara eftir tilnefningum Blaðamannafélagsins," segir Arna Schram á vef Blaðamannafélagsins.

Þá segir Arna enn fremur: „Ef ráðherrann ætlar að vera samkvæmur sjálfum sér hlýtur hann að endurskipa í sérfræðinganefnd NJC eða krefjast þess að Ólafur Stephensen segi sig úr stjórn námsins í fjölmiðlafræði við Háskóla Íslands. Ég tek það fram að þetta hefur ekkert með hæfni Ólafs að gera, en það sama hlýtur að ganga yfir þá Ólaf og Birgi Guðmundsson.“