Kjarvalsmyndin seld á 25 milljónir króna

Málverkið Hvítasunnudagur eftir Jóhannes Kjarval var slegið hæstbjóðanda, sem bauð 1,3 milljónir danskra króna í verkið hjá danska listaverkasalanum Bruun Rasmussen í Kaupmannahöfn núna á sjötta tímanum. Fulltrúi Gallerí Foldar keypti myndina fyrir hönd óþekkts kaupanda. Heildarverð með þóknun og sköttum telst um 25 milljónir íslenskra króna. Þetta er hæsta verð sem greitt hefur verið fyrir íslenskt listaverk á uppboði.

Málverkið var boðið upp í hópi verka meðal annars eftir Picasso, Miro, Asger Jorn og fleiri meistara. Verkið hafði verið verðmetið fyrir uppboðið á 1,200 til 1,750 þúsund krónur hjá listmunasalanum.

Ekkert er vitað um kaupandann annað en að hann er íslenskur, en tilboðið kom símleiðis. Jakob Bjarnar Grétarsson, blaðamaður Fréttablaðsins, fylgdist með uppborðinu. Hann sagði í samtali við Vísi að andrúmsloftið í salnum hafi verið "algjörlega rafmagnað" þegar Kjarvalsmyndin var boðin upp. "Salurinn var troðfullur," sagði hann.

15 verk eftir Svavar Guðnason voru boðin upp í hádeginu hjá Bruun Rasmussen. Dýrasta myndin af þeim, var akrýlverk sem metin var á 6-8000 krónur danskar en fór á 32.000 krónur danskar eða um 375.ooo krónur íslenskar. eða með uppboðslaunum -- næstum hálfa milljón íslenskra króna.

Dýrustu verkin á uppboðinu í dag samkvæmt matsverði Bruun Rasmussen eru verk eftir Asger Jorn og Reykvíkinginn Odd Nerdrum, sem bæði eru metin á um 23 milljónir króna.