Vill að Wilson Muuga verði fjarlægt hið fyrsta

Hákon Magnússon, eigandi jarðarinnar Nýlendu í Sandgerði, vill að Wilson Muuga verði fjarlægt af strandstað án tafar. Fram kemur á vef Víkurfrétta að Jónas Þór Guðmundsson, héraðsdómslögmaður, hafi sent bréf fyrir hönd Hákonar þess efnis til útgerðar, umboðsaðila og vátryggingarfélags skipsins, en bréfið hefur einnig verið lagt fram til kynningar hjá bæjarráði Sandgerðis. Í bréfinu segir að skipið sýnist strandað í fjöru eða netlögum jarðarinnar Nýlendu og er skorað á hlutaðeigandi aðila að fjarlægja skipið án tafar.