Fyrrverandi starfsmenn Varnarliðsins fá loks launamiða

Launamiðar frá Varnarliðinu munu á næstu dögum berast til fyrrverandi starfsmanna þess og því ættu þeir ekki að lenda í vandræðum með skattframtöl sín. Þetta kemur fram á vef Víkurfrétta.

Þar segir að launabókhald Varnarliðsins hafi verið keyrt i gegnum kerfi sem vistað var hjá Skýrr en sá þjónustusamningur rann út í lok september þegar Varnarliðið fór af landi brott. Skýrr bauð Varnaliðinu að framlengja samninginn fram yfir áramót en engin svör bárust til baka frá höfuðstöðvunum í Napólí á Ítalíu. Því gat Skýrr ekki keyrt út launamiðana þar sem til þess skorti samþykki og aðgangsheimildir frá hermálayfirvöldum.

Utanríkisráðuneytið beitti sér í málinu sem varð til þess að hnúturinn leystist og í gær hóf Skýrr að prenta miðana.